Keur barudak di kampung, anu can kasabaan – komo nyekel – alat éléktronik anu canggih saperti Ninténdo, acara radio anu dipikaresep nyaéta dongéng Sunda. Di warung Mang Ja’i, barudak sok ngumpul wanci lingsir ngulon (jam 13.00) jeung ashar seja ngadéngékeun dongéng Sunda ti Mang Dina Mara , Mang Dedi Mulyadinata, jeung Wa Képoh.
Barudak kacida mikaresep kana dongéng Sunda katambah anu boga warung geus surti, tiap jam anu geus ditangtukeun sok mindahkeun galura radio kana stasiun anu midangkeun dongéng Sunda.
Tug nepi ka kiwari, sababaraha judul dongéng Sunda jigana masih diinget ku barudak saentragan anu ayeuna mah geus jaradi bapa-bapa. Umpamana: Si Kampéng Sésa Gelap, Ngadu Jago, Dedemit Gunung Warangas, Talaga Hideung, Si Rawing, Si Kulup, Si Buraong, jrrd. Acara dongéng Sunda beuki dipikaresep lamun geus asup bulan puasa. Dipan warung Mang Ja’i dipinuhan ku barudak, moyég, jeung daria ngaregepkeun jejer dongéng.
Dina bulan puasa taun 1988, dongéng Sunda anu banget dipikaresep nyaéta carita Si Jeki jalma buraong. Jalma buraong nepi ka dipikaresep ku Erawati. Dén Yoyo salaku tokoh antagonis jalmana pupujieun, hayang disebut jegud, totolosoan hayang beunghar ku cara muhit ka Déwi Centring Manik. Geus puguh ari hirup mah mihak ka jalma bener, dina panungtung dongéng Si Jeki bisa laki rabi jeung Erawati.
Salian éta, dongéng Sunda Si Kampéng Sésa Gelap jadi primadona. Ampir di tiap imah, kira wanci jam dua beurang, kadéngé sora Mang Dina hut het, cuh cih, ngadongéng. Béda jeung Mang Dina, Mang Dédi mah biasana sok ngadongéng anu boga jejer pasualan-pasualan werejit, jurig, jeung dedemit. Umpamana; Dedemit Gunung Warangas , tokoh protagonisna nyaéta Mang Itok. Carita Tangkorak Hirup, jrrd.
Henteu anéh, tiap isuk, barudak sok nyaritakeun deui jejer carita tina dongéng Sunda ti A nepi ka Z. Anu henteu kungsi ngadéngékeun ogé antukna jadi apal ti anu cumarita. Anu asalna henteu pati resep kana dongéng Sunda ogé bijil rasa panasaran jadi hayang ngadéngékeun. Jigna henteu salah nalika aya anu ngomong: lolobana peradaban jeung kamotékaran hirup jalma ditangtukan ku “kisah” jeung carita.
Nalika nincak kelas lima Sakola Dasar, dina salah sahiji stasiun radio midangkeun dongéng Sunda Wa Képoh anu judul Si Rawing. Kuring tara katinggaleun saépisode ogé ngadéngékeun éta dongéng nepi ka tamat.
Radio transistor anu dihirupan ku batu batré cap Kuda Terbang mimiti kalindih ku radio –tape –recorder mérk JVC dina awal tahun 1990. Radio ogé geus dihurungkeunna ku listrik. Loba masyarakat geus aya anu maké ampli jeung salon badag sangkan sora radio jeung tapeder leuwih tarik ti sasari. Ngan saheuleut jeung beuki majuna widang téknologi, dongéng Sunda ogé mimiti ngalaman melempem kasedek ku lagu-lagu dangdut.
Mangsa beuki ngangsreg, gancangna lir kilat. Di juru-juru kahirupan anu dipidangkeun lain dongéng Sunda deui. Tapi carita-carita kahirupan anu beuki henteu puguh, pajeujeut kawas benang nu pagujud, silih rewég kawas ucing parebut pais lauk. Teuing marebutkeun naon? Ngan saukur catur tanpa bukur.
Tapi kabéh ogé bakal sarua jeung jejer caritaan dina dongéng Sunda, anu bener bakal pinunjul anu jahat bakal tumpur ludes. Kabéh moal nyésa, alam bakal simpé deui, sarua jeung tukang dongéng anu nutup carita ku kecap: Euh Waktosna Henteu Nyekapan, Pamiarsa….. Simpé, jempling.
Posting Komentar untuk "Puasa di Lembur: Dongéng Sunda (Hanca 17)"