Sakola di SMP teu jauh béda jeung nalika masih nyuprih pangarti di SD, utamana dina kompoisisi antara guru lalaki jeung guru awéwé. Jumlah guru lalaki biasana sok leuwih loba tibatan awéwé, hal ieu didasarkeun ku papagon jeung norma kahirupan di dunia mangsa harita.
Ngan tangtu baé, kompoisisi guru lalaki leuwih loba tibatan awéwé lain hartina harkat darajat lalaki leuwih luhur ti awéwé. Ieu mah ngan saukur pasualan widang partikular baé, lain masalah substantif.
Di SMP Negeri 3 ogé kitu, jumlah guru lalaki kurang leuwih 80%an ti sakabéh tanaga atikan. Jeung geus teu kudu dicaritakeun kumaha garalakna guru taun 80-90an.
Lamun disalusur jeung ditalungtik kalawan daria, naon anu jadi sabab guru mangsa harita loba anu leuwih galak dibandingkeun jeung mangsa kiwari? Hal ieu nétélakeun ayana seléksi alam dina kahirupan.
Saupamana, guru taun 80-90an kurang teges jeung peupeuleuyeuan teu pantes, geus pasti Kahirupan bangsa urang dina mangsa harita bakal leuwih rongkah ku pasualan. Katambah, barudak mangsa harita kasebut ogé generasi emas tungtung milenium kahiji.
Perlu ogé dikanyahokeun, galakna guru téh lain di nagara urang wungkul, da ampir kabéh nagara nerapkeun atikan kumaha cara ngaronjatkeun sikep disiplin ka barudak.
Ku sikep kitu, mangsa harita karasa pisan tumuwuhna rupaning kamotékaran jeung kamonésan dina kahirupan; lagu-lagu alternatif bral ka dunya, transisi kahirupan dina cara tradisional kana cara modérn, jeung ngaronjatkan kaweruh jalma dina maca pasualan sosial.
Anu matak, guru mangsa harita miboga sikep tandes jeung teges sangkan alam kahirupan jalma sabanding jeung naon anu baris disanghareupanana.
Dua urang guru anu kungsi ngatik olahraga atawa pendidikan jasmani barudak SMP negeri 3 nyaéta Pa Tédi jeung Pa Inof, ngaran pituinna mah Nofrison.
Sanajan katingalina teu galak jeung mémang euweuh tagog sentak sengor, tapi barudak tara kumawani arélég di hareupeun Pa Tédi jeung Pa Inof.
Tong boro élég, saukur najong bola baskét baé, kari-kari katénjoeun ku Pa Tédi geus pasti barudak bakal meunang hadiah, ditéké tarang. Harita disebutna tarang dipolés.
Ngan ari Pa Inof mah tara tuka-téké sumawona cubak-cabok, paling maréntah barudak anu arélég sina squat jump atawa push up. Mémang katingali béda cara ngatik atawa métode atikan anu dipraktékkeun ku Pa Inof jeung Pa Tedi nalika di kelas. Pa Tédi mah tandes konvénsional, Pa Inof mah luwes komunikatif.
Widang atikan olahraga dibagi dua, aya anu prakték langsung di lapangan atawa di rohangan, kaduana téori anu diajarkeun di kelas.
Dina prakték, barudak biasana dititah heula "pemanasan", matéri pangajaran salila di kelas dipraktékkeun di lapang samodél baskét, cara drible, hop step jump, back roll, pilates, cara serven voli, jrrd.
Sakapeung sok ngahaja barudak diabringkeun ka lapang profélat, lapang taneuh beyedug lamun keur usum halodo. Ditambah, barudak kudu renang sabulan sakali di Prana. Pancén tambahan keur para pamilon atikan nyaéta nyieun kliping olahraga.
Ku ayana dua cara atikan antara téori jeung prakték, barudak jadi mikawanoh John Naismith, William G Morgan, ukuran lapang bola, sabaraha luhurna nét voli, jrrd.
Ku cara prakték, barudak jadi apal kumaha mimiti atawa awalan lumpat sprint, jarak menengah, jarak jauh, jeung marathon. Barudak ogé jadi apal kumaha posisi jempol nalika sérven voli, naon anu disebut double dina baskét, jeung naon anu disebut three second rule.
Jigana, sakabéh pangarti jeung naon anu dipikanyaho ku Pa Tédi jeung Pa Inof bener-bener diketrukkeun ka barudak. Sok sanajan éta dua guru lain atlét dina hiji widang olahraga, tapi sahenteuna geus bisa méré téori jeung prakték sababaraha jinis olahraga keur bekel barudak dina mangsa ka hareup.
Posting Komentar untuk "Guru: Pa Tédi jeung Pa Inof"